mercredi 30 décembre 2009

عماد 2014

كل شوية ، يرجع الحديث على سي عماد، و على حكاية الباطو ولا هو اليخت المسروق ، و على فرانسا و المحاكمة. و يبداو جموع المعارضة متاع فايسبوك يبارتاجيو* الأرتيكلوات و الفيديوات في الليل ، و تفصيص من كل شيرة. حسب علمي، اخر مرة، سلكها في الحكم، اما استينفو ولا شنية، مولا الباطو قرنيطة ، جربي قديم و ربي ما يعرفوش.. تي الحاصل، اللي متأكد منو اللي لمور مازالت ماهيش واضحة ميا في الميا. المهم واحد م الناس، كي خممت فيها الحكاية، و حللت مليــــــــح مليح ، لقيتها برجولية (ولو أني الرجولية ما عندها حتى دخل) فرصة عظيمة و تاريخية، لو كان يكبشو فيه الفرانسيس و يطلعو ماندا توقيف انترناسيونال. يولي عنا في تونس "فوجيتيف" بالفم و الملا. الجموع السطحيين ، ديراكت توا يخممو اللي المعلم الأعظم و السيستام بش يكبشو و يشدو الصحيح و يدافعو على سي عماد كف و مشطة. ما ظاهرلي. من شيرة الحاكم متاعنا مش عوايدو يتحدى الغرب بالحق (و الجربي اللي شاكي بعماد ماهوش من هاك الحفتروش متع حقوق الانسان، السيد هذايا قالك اصحاب و عشرة هو و ساركوزي بونابارت) ، من شيرة أخرى ما ظنيش كان سي عماد بش يكون أعز على "بابانا" من اولاد اللطيف (يا حسرة) ولا من حسيب ولا من شيبوب ولا من جيلاني، و غيرهم م الحواشي اللي طلعو و هبطو . كيف تاكل بعضها، "بابانا" يلوح على طول يدو. كيف يطلع الماندا، ألف في الميا "بابانا" بش يبعث أس.أم.أس لعماد يقلو "عندك جمعة فيدك، قطع، افصع،اختفي. لوووول".
أنا نشوف اللي الحكاية هاذي لازم تفرح اليسار التونسي ع اللخر، على خاطر ها الماندا هاذي هي فرصتو الكبيرة ، و يمكن الأخيرة، في أنو يتوحد. يقول القايل كيفاش. ساهلة الحكاية. عمي عماد بش يلقا روحو "أوبليجي" يولي فوجيتيف و يعيش في الكلاندستينيتي. أما بما انو عايش حياتو الكل بتبهبير، ماهو بش يعدي الجمعة الأولى كان بطلوع الروح. يهبط يسهر في الحمامات، يعرضو حاكم في الثنية، يشاورلو يوقفو :
- أوراق الكرهبة
- لاباس في مخك انت؟؟؟ ماكش عارف روحك مع شكون تحكي؟؟؟
- شنية شكون ، ماهو واحد بالعو و حارق الفوروج. هيا عيش بابا مد اوراقك و اوراق الكرهبة مادامني مازلت موسع بالي معاك
- يا ولدي، راني مش نباصيك، راني ننسيك ترمتك وين .. زيد ثبت روحك، على خاطر اولادك، ما تخليهمش يتامى
- أيا فك على ديربي م القحب متع امك الكلبة، و هات زكّم اوراقك لا ننيك ندوخك
- اها سي زبي اها، عماد الط**** معاك
- شنوة
- عماد الط*** ... ففف
- أوه على الزبي ملا بهيم متاع نمي، تي اش تعمل هوني انت؟؟؟ فوجيتيف راك ... نورمالمون نوقفك انا راهو، ياخي ما قراووكش؟؟
-- أوووه، ينعن دين هالعملة الكلبة، سامحني صاحبي، مشا من بالي جملة.
- ايا برة ارجع لراس النهج، و نعاودو من جديد
- شنوة، كي نرجع نخلط هوني نمدلك ديراكت االاوراق من غير ما نقلك على اسمي؟؟
- تي لا لا، يا بهيم، كي تشوفني نيك دومي تور من راس النهج، و قطع بجلدك أوكي؟؟
- باهي، فهمتك ... و المرة الجاية نورمال؟؟
- أما مرة جاية متاع رب امك؟؟ يا ولدي راك "فوجيتيف" ، "وانتد"، مطلوب القبض عليك حيا أو ميتا
- ايه فاهمك، و مبعد
- الزاااااااااااا ...ما لازمكش تتشد، مالازمكش يشدك حاكم ، كابيش؟؟
- هااا .. باهي باهي .. ما لازمش يشدني حاكم ، فهمتك ... براس اميمتك هاي وريقة ، قيدلي بالضبط بالضبط شلازمني نعمل ... تي الكليمتين اللي قلتهملي توا
- نعن دين ام ها العيشة الكلبة ... هات
- و بالكبير
- باهي .. الكرفي متع وذني .. "كي تشوف حاكم، قطع طول" .. واضح؟
- يرحم والديك ... هيا هاك هال250 دينار
- شنية هاذي؟؟
- رشوة بش ما تبلغش اللي انت ريتني
- فوالاا ... تعجبني كي تحل مخك
- يعيشك .. راني النابغة متع العيلة، ما تحقرنيش ... هيا تشاو، سايسلي روحك

الحاصل سي عماد بين نهار و ليلة بش يلقا روحو كلاندستينو ... و بما أنو ما عندوش الخبرة الكافية، و ما عينوش بش يتوقف و يعرضو واحد م الجماعة لي حطهم في قلبو، بش يبدا يسئل و يتنتس ، شكون ينجم يعاونو و يأطرو في السرية ... في اخر المشوار، بش ينعتوه على الزوز المختصين الكبار : الخوانجية و البوكت. و بما أنو بطبيعتو مش حبيبات برشة هو و صخر، و جويست ما يحبش يسيب ال"كوك" و الويسكي، م الدخلة مش بش يتفاهم بلقدا مع الخوانجية. يقعدولو البوكت. تليفون لبرهان ، يلحملو واسطة ولا زوز، و تبدا المفاوضات.
بالنسبة لعماد ، الحكاية مرشنداج واضح : أنا عندي الفلوس ، و انت عندك الخبرة. نتفاهمو ، ننجمو ننفعو بعضنا بلقدا. عمك حمة يطلب شوية وقت بش يشوف أمورو الداخلية. في المقر المركزي متاع الحزب، يتعقد اجتماع رفيع المستوى لمجلس السوفيات الأعلى الألباني بتونس، بحضور كافة الأعضاء ، الي هوما حمة و راضية. المداولات صعيبة، بالخصوص و انو السيد ممسخ برشة بدم الشعب و عرق الشعب. حمة يستنتج منها اللي عماد يعرف برشة حاجات ع الشعب، بما أنو يا ما مصلو دمو و شربلو عرقو، معرفة عضوية بأتم معنى الكلمة حسب المفهوم الغرامشي، و هاذي حاجة تنجم تنفع. راضية تزيد تلاحظ اللي عماد من أكثر الناس العارفين و العالمين بأسرار الطبقة البرجوازية العميلة المنحلة، و التكتيك الثوري يقول : "اعرف عدوك"، و شكون خير من عماد يدلنا ع العدو و يوصفهولنا. يسكت حمة شوية، تنزل من عينو دمعة و يقول "تقولش عليه انجلس** متاعي انا". بعد ساعتين مداولات و 36 كعبة بيرة ، يتوصلو الى أنو، علميا، و حسب النظرية الثورية الإشتراكية، عماد فرصة عظيمة، و يقررو يتحالفو معاه، و استغلال جميع الفوائد متاعو. حمة يقترح على عماد أكثر م التأطير : تحضير حركة ثورية عمالية شيوعية اشتراكية قايمة ع المساواة في الإرث و اللوز المالح. و تنطلق شرارة توحيد اليسار التونسي.
يقول القايل كيفاش ... صحيح، كيفاش؟؟ لحكاية ساهلة و واضحة. عماد ولا الممول الرسمي للبوكت، حمة يولي يلقى بزايد فلوس في ميزانية الحزب، و يخصص جزء للمصالحة . يشد كالكولاتريس و يحسب عدد الكعبات قزاز اللي خلصهم عليه الكي. يمشي يخلصو. و بما انو توة عندو حليف جديد قوي، يقصها مع الخوانجية. هكا ، الكي ما بقالوش علاش يواصل الإنشقاق، و الزوز يعملو مِؤتمر سري توحيدي موحد. و في ندوة صحفية تحضرها جميع فعاليات المجتمع المدني، يعلنو اللي هوما بش يخلصو جميع ديون البيرة و الروج و الكمية متع مختلف شخصيات اليسار التونسي من نزار البطي لأحمد نجيب لعمك علي بوستة لبن طبيب الكــــــــــــــــــل ... و تتخصص ميزانية موحدة مشتركة للبيرة تتلم كل نهار و تنظر في الدوسيات و المطالب الكل في 5 سوايع. هكاكة تختفي أسباب الانشقاق الكل ... و هذا الكل بفضل شكون؟؟ سي عماد طبعا... و الصحف المعارضة تولي تنادي بعفو تشريعي عام على سي عماد، و تندد بالتدخل الاستعماري المقنع (كيف النمر) متاع الفرنسيس. و الطبقات الشعبية و الجماهير الكادحة تتفاعل مع سي عماد الفوجيتيف، اللي تكرهو فرانسا و أمريكيا، كيما كرهو صدام. و عمك الصيد يعمل لجنة مساندة و رفع حصار، و تخرج مظاهرات تطالب بإطلاق سراحو قبل ما يتشد، و في حركة رمزية، يقرر الحزب اليساري الموحد الجديد : "حركة تكتل تجديد البوكت اليساري الإشتراكي الوطني الديمقراطي التقدمي النقابي الراديكالي من أجل العمل و الحريات" ترشيح عماد لانتخابات 2014 ... و .... و ... واصلو انتوما

*ypartagiw : du verbe "ypartagi", qui veut dire salir le mur de kelkun d'autre par un truc qui le fait chier, mais qu'il regarde quand même
**Engels : faza ki a vécu avec Marx, ki était riche et communiste, prêtre et athé

dimanche 13 décembre 2009

طريحة و تعدات


كيف يقوى الضرب ، تحس اللي نورمال، و نورمال ، ثم نورمال و نورماااال جدا. سايي ، اللحم كساح ، و اللي زراق
زراق ، و اللي خضار خضار ، و الدم سواقي، سايي. قعدت حاجة وحدة برك : الروح. عندها معنى ولا ما عندهاش؟؟؟ كان جا عندها معنى قبل ، راهو اللحم ما زراقش بالضرب. في اللحظة هاذي لازم يولي عندها معنى. على خاطر سايي ، اش مازال فيها، اللحم زراق يا بوقلب. كان بش تقعد هاينة ، بلاش بيها خير. صرفاق ورا صرفاق يتعدى ، و انت فوق من بدنك ، ما عادش ع لبالك بيه. تغزرلو يتفتق تحت الساقين. تحس وجهك من داخل يفبري كي بلار حوانت نهج روما وقت ما يتعدى المترو. ما عادش بيها وين. لازم يولي عندها معنى. ها الروح لازم تفصع بيها لفووووق. لازمها تعيش حتى درج في ها الدنيا الكلبة. مشطة و بونية ورا بونية ، الكرش ما عادش توجع. جوست تبعث سينيال مع كل ضربة، متاع "يا أنا ، ما ترخش ، مازلت هوني ما دختش، غير انت شد الصحيح" ..
كيف يقوى الضرب ، تولي زاااان ، ماعادش تسئل ، تولي تجاوب برك ... ما عادش تسئل " شبيه ربهم يضربو فيا هكا ؟؟؟ لواه؟؟ شعندي عملت؟؟ على ديرب كلمة، على رب أم أرتيكل؟؟؟ وين ديربهم نهار اللي هدو ثلاثة سكارى على مرا حبلى في قلب ساحة برشلونة؟؟" .. ما عادش تسئل ، تجوب برك. تفيق اللي نهارتها كانو مركزين مع حارة متلمين في بار ، يتبعو فيهم اش يحكيو ، و اخرين كانو بحذا جامعة ، يحصرو في شلة مضربين ... المهم ما كانوش غادي، و عمرهم ماهم بش يكونو غادي. يزيد يقوى الضرب ، و البدن ، بدنك، يكبش فيك "ما تخافش ، أنا مازلت نقاوم ، غير اقعد حالل عينيك". مشطة بين الساقين، و الأعصاب شايخة تزغرد. أرتيكل واحد، خرج الهبال هذا الكل. تثبت في بدوناتهم. تفيق بيهم هوما زادة مقموعين. بدوناتهم مش ملكهم. كلامهم مش ملكهم. كيف البوراس بو مرايات كحلة ينده على يدك بالبرودكان الحديد و يفتق منها جلدة ع اللحم ، و يقول "أمك القحبة ننيكوهالك ، عامل فيها ديرب بطل. هاي البطولة متاع رب أمك" ... تشلق اللي ماهوش البوراس بومرايات كحلة هو اللي ضرب ، ماهوش هو اللي نطق ...الحاكم هو اللي تكلم و ضرب ... كيف يقوى الضرب تفيق اللي انت تكزيستي ، و هو لا ... انت قاعد تتضرب ، و يدك جلدتها تفتقت .. هو مش موجود ، هو منفي لداخل بالكل، كاري بدنو و لسانو للحاكم ... حاكم جبان ، ما عندوش الجرأة بش يهبطلك بجرمو ...
كيف يقوى الضرب، تفيق الروح. ما تهونش ، بالعكس تتنفس و تعارك بش تعيش. تتفكر البو و الخو و الصاحب و الحبيبة ... تخاف عليهم. تخمم فيهم. عقلك يقلك "يا بهيم ، حصلت" أوكي مستر عقل. بعد ما يوفى الضرب نتفاهمو المرة الجاية شنية نعملو. أما توة ، خلي الروح تعيش. تهز عينيك وسط الغبابر ، تشوف الجهامات تلهج، عارقة. حبس الضرب. وفات الطريحة. الجهامات يغزرو لخدمتهم، مستكفين . بدنك بكلو مرهوج. أطراف أعصابك كلها مهرجانات و بافلوات تصيح و تعيط. الوجيعة مبنكة بحذاك تعمل في قارو كريستال، أكبر م الحد اللي يقبلو المخ.أما بدنك معاك. تاقف. الحوايج مقطعة، غبابر ، الشعر الموسخ بالطبعة : لكلها جزئيات صغيــــــــــــــــرة ما تحسهاش. الروح تمد يدها للبدن ، و ياقف .. ما ينجم كان ياقف. يتلفتلك زميم الجهامات اللي كانو نازلين عليك. يلوح كلام. تقريب كيف اللي قاعد يسئل ولا ندرا شنية. تغزرلو من ورا مراياتو. "سامحني عمري ما حكيت مع حيوانات قبل، و عمري ما فهمتهم". صوتك كي يخرج، تقولش عليه صوت واحد كان متكي مرتاح. يجيك الصرفاق. تغزر ليدو بالرالونتي و ما تتحركش. ترجع تتلفتلو : " خريت فيه، هاك ضربت". "المرة هاذي سايسناك، المرة الجاية توة ندوخو ربك، دبابز تونس الكل لوما نقعدوك عليهم صرمك لوما نقطعوهولك يا ولد القحبة. نيكمها لوما نوبنو ربك". "محسوب ، هاي ماشية معاك الوبنة ، بالكشي تواتيني أنا زادة، بطبيعتي متفتح ع التجارب الكل، زيد كبارات العالم الكل موبنة" ..."زيد تقوحب زيد" ..."ما عينيش، عندي ما نعمل" ... يزيد يغزرلك و عروق راسو بش تتنطر. يعرف اللي ما عاد عندو ما يعملك. بروقرامو وفا ، خدم خدمتو. يزيد يقردحلك. و انت ما تتحركش. يتحلحز ، و انت ما تتحركش. لأول مرة في حياتك، تعرف اللي انت فوق أرضك. يمشي. ترميلو "ما تنساش عاد تخرج الدبابز من ترمتك و تحضرهملي .. اهوكا خيرلك م البطالة" ... يرجعلك يجري و يعطيك بدماغ .. توخر و تتبسم "هاك تنجم تعمل حاجة براسك ، زيد ترانا شوية توة تكتشف فازات اخرين تنجم تعملهم براسك ... التخمام مثلا" ... يربرب و ينده على روحو
امالا اش في بالو ... هاو ضرب قد ما حب ... تحبني نسكت؟؟؟ العصبة ... إذا اليوم ملكو ، غدوة ما زال ملكي ...
اصحابي اللي تحيرو علي ، و سألو علي، و باز راهم عقلوني توة ، نقوللهم : نورمال ، طريحة و تعدات...

في الاخر، اصحاب النفوس الرهيفة، سامحوني ع الكلام المنتن .. أما راهو الواقع أنتن 10000000 مرة